جائنا البيان ...................................التالي:

الحكومة ضارة جداً بالصحة
بعد إلغاء دعم الخبز وغلاء السكر والأرز والزيت والسمن وباقى ضروريات المعيشة قررت الحكومة استيراد أحبال جيدة الصنع تصلح للشنق، مع استيراد أطنان من سم الفئران. وهذا لزيادة الطلب على الأصناف المذكورة!! على أن يكون مكتوبا على كل حبل وعلى كل علبة سم... الحكومة تضر بالصحة وتسبب الوفاة
*******
غاز مصر ياعيني عليه
وزير البترول يصرح بأن أسعار عقد الغاز مع اسرائيل سرية.. عنده حق يا جماعة ..هو الغاز بتاع الشعب المصري علشان يسأل على سعره والارباح اللى جاية منه؟!.. دا بتاع الحكومة والرجالة الكبار.. بطلوا حسد وقرّ على الناس
*******
صباحو وطنية
الفنانة الكبيرة شيرين.. آه ياليل سابقا، وماشربتش من نيلها حالياً.. سافرت أمريكا علشان تولد وبنتها تاخد الجنسية الأمريكية.. وسلّملي على الاغاني الوطنية وأهو كله اكل عيش.. وسلام كبير للوطنية
*******
احنا أسُود على بعض بس
السيد الاستاذ احمد ابو الغيط.. يعني ما سمعناش انك كسرت رجل حد من الاسرائيليين لما الطفلة المصرية اتقتلت على الحدود بالرصاص.. هو احنا أسود على بعض بس؟
*******
الرواتب العالمية
تبرر الحكومة ارتفاع الأسعار بانها ظاهرة عالمية.. طيب يا ترى هل ستصل الرواتب فى مصر إلى العالمية أم ستظل محلية؟
*******
اتفقوا علينا احنا
يا جماعة احب اهنيكم بالمناسبة السعيدة فأخيرا اتفق وزراء الداخلية والإعلام العرب على حاجة.. بس المشكلة انهم اتفقوا علينا احنا
*******
البرلمان الأوروبي ينتقد حالة حقوق الإنسان في مصر
مصر تستنكر بشدة وترفض رفضا قاطعا مشروع القرار المقدم إلى البرلمان الأوروبى حول حالة حقوق الإنسان فيها وسرور يهدد بفتح ملفات انتهاك حقوق الإنسان فى أوروبا.. لا تعليق
*******
مصر المـ(خـ)ـروسة
هو بعد كل شهر والتانى يموت لنا واحد على الحدود مع إسرائيل و بعد كده يرجعوا يقولولنا معلش ماخدناش بالنا إحنا غلطانين؟.. أنا عايز أعرف حاجة هو إحنا ما بنغلطش زيهم ليه؟!؟
*******
الحرية
من أبرز احداث 2008 اتساع هامش الحرية فى مصر بشكل غير مسبوق، فالآن المواطن يستطيع أن يختار وبكل حرية.. كارت.. كنترول .. أو خط فاتورة مفتوح
*******
تطبيع
سمعنا أن الحكومة ناوية تطبّع مع الإيرانيين.. أنا بقولها من باب أولى انها تطبّع مع المصريين الأول
*******
عقبال المترو
تعتزم الحكومة تشغيل قطار سريع يقطع المسافة بين القاهرة والإسكندرية في ‏45‏ دقيقة.. نتمنى تشغيل مترو يقطع المسافة من حلوان الى المرج في نفس المدة
*******
الأرض الزراعية
لمواجهة مشكلة نقص مساحة الأرض الزراعية وللحد من إستيراد المواد الغذائية بالدولار يمكن للحكومة زيادة الإنتاج الزراعي ومضاعفة مساحة الأرض الزراعية وذلك بصدور قرار وزاري بجعل الفدان 12 قيراط بدل 24 قيراط
*******
الاخضر خدمة مميزة
الحكومة مشكورة ممثلة فى هيئة النقل العام عاوزة تعمل خدمة مميزة للمواطنين فقامت بطلاء الاتوبيسات والمينى باص القديمة باللون الاخضر وضاعفت الاجرة وكتبت عليها (خدمه مميزة) امال لو بقى لونها تيريكِواز الأجرة هاتبقى بكام؟
*******
حرق القش
محافظة الدقهلية تحيل‏ عشرات‏ المزارعين إلي النيابة العامة لقيامهم بعمليات حرق لقش الأرز في وضح النهار‏.. أحسن.. علشان مش صابرين لما الليل ييجي
*******
التقدم في مصر
بعد الاعلانات عن التقدم العلمي والصناعي والزراعي الرهيب اللى بتشهده مصر واللى القنوات المحلية خلتنا حفظاها.. خلاص مابقاش بينا وبين اليابان إلا خطوة واحدة
*******
مكافأة جنيه زيادة لعمال النظافة في كفر الشيخ
مجلس محافظة كفر الشيخ قرر زيادة أجور عمال النظافة من 6 جنيهات يوميا إلى 7 جنيهات وذلك تشجيعا لهم.. يالاّ علشان يجوزوا العيال واللي عاوز يبني الدور التاني كمان واتبرعوا بالباقي لسداد ديون مصر.. وعجبي
*******

__________________

أحب الصالحين ولست منهم
لعلـــــي أن انال بهم شفاعة
وأكره من تجارتهـم معاصـي
وإن كنا سويـــا في البضاعة